Teknís ehf byggir á gömlum grunni. Sigurður Jónsson hóf rekstur vélsmiðju árið 1956. Fyrstu verkefnin voru bygging olíugeymis fyrir Olíufélagið hf á Fáskrúðsfirði og lýsisgeymis fyrir fiskimjölsverksmiðjuna á Djúpavogi. Verkefnin gengu vel og strax ljóst að grunnurinn var lagður að farsælum rekstri vélsmiðju.


Vélsmiðja Sigurðar Jónssonar hf byggði olíugeyma fyrir Olíufélagið hf (ESSO) allar götur síðan og sinnir fyrirtækið enn verkefnum fyrir Olíudreifingu ehf sem tekið hefur yfir allar olíubyrgðastöðvar sem áður tilheyrðu Olíufélaginu síðar N1 og Olís.


Bygging stálgeyma er og hefur verið ein helsta sérhæfing fyrirtækisins en auk þess fæst Teknís við ýmis önnur verkefni allt frá framleiðslu handriða upp í vegbrýr og önnur stærri mannvirki.


Rekstur Vélsmiðju Sigurðar Jónssonar hf hófst 1956 en fyrirtækið sameinaðist Teknís ehf fyritæki Jóns Þórs Sigurðssonar 2005 og er í dag 100% í eigu Jóns Þórs sonar stofnandans Sigurðar Jónssonar.



Teknís hefur starfsstöðvar í eigin húsnæði við Skútahraun 11 sem er 640m2 iðnaðarhúsnæði. Verkefnin eru fjölbreytt og leggur félagið áherslu á að þjóna sínum viðskiptavinum þannig að framtíðar samband myndist með beggja hag að leiðarljósi. Meðal verkefna sem félagið hefur tekið að sér á umliðnum árum má nefna byggingu yfir 100 stálgeyma frá 50m3 upp í 8200m3 að stærð fyrir olíufélög, hitaveitur og fiskimjölsverksmiðjur, Brú á Laxá í Mývatnssveit fyrir Vegagerðina, Göngubrú við Sóltún í Reykjavík fyrir Reykjavíkurborg og Vegagerðina, Gufuskiljur á Nesjavöllum fyrir Orkuveitu Reykjavíkur, 3,5km af Nesjavallaæð fyrir Hagvirki, smíði og uppsetning fallpípa Búðarhálsvirkjunnar í samvinnu við Íslenska aðalverktaka hf fyrir Landsvirkjun. Teknís hefur einnig átt farsælt samstarf við stærsta verktakafyrirtæki Danmerkur Per Aarsleff a/s um verkefni á Grænlandi. Árið 2012 lauk Teknís endurbótum á eldsneytiskerfum herstöðvar Danska hersins í Grönnedal á Grænlandi og snemma árs 2013 var gerður 3ja ára samningur Aarsleff og Teknís um endurnýjun olíkerfa fyrir gasolíu og flugvélaeldsneyti í herstöð Danska hersins í Daneborg á Grænlandi. Snemma árs 2014 bættist svo við endurnýjun eldsneytiskerfa í Station Nord á Grænlandi og lauk því í júlí 2018.